LORE

Umeak iratzarri du, goseak titi bila. Argitzen ari du, eta laster gizonak prestatuko dira ihizira joateko. Lore, piko batzuk jan eta haurra bizkarrean mandril larruan bildu eta basora atera da, auzoko emakumeekin. Bi ilargi gelditzen dira fruituak biltzeko, basoa hosto galtzen hasiko da, eta hego aldera mugitzeko tenorea izanen da. Kalabaza bat hustua darama bezperan zuhaitz batean erle abaraska ikusi zuen, eta gaur eztia bilduko du. Bizpalau ordu aritu da emakume aldea jateko biltzen, haurrak gibeletik jauzika, elkarri jarrai, jostetan, gaiztakerietan. Eta bildu dituzte intxaurrak, pikoak, gereziak, urrak, masustak eta zain horiak, eta patata basak. Lorek, loreak hartu ditu, bere gizona itzultzen denerako ilea apaintzeko. Beti polita nahi du izan, eta lorez apaintzea maite du; horregatik Lore erraten diote.

Duela 150.000 urte Sapiens bizi omen zen Afrikan. Horrela diote zientzialariek. 70.000 urte bertzerik ezta Afrikatik atera eta mundu osoa kolonizatu zutela. 12.000 mila eskas landareak eta piztiak hezi zituztela. Nekazari bihurtu ziren,( hitzak adierazten duen bezala neke-zare) Jinkoak egin zituzten asmatu, eta haien debeku eta aginduetara bizi. Baina, hori ez daki Lorek, ez daki Afrikan gelditzen den ehiztari- ekoizle multzo bakarra dela berea. Nola jakin?. Habtzabe-ak erraten dietela, eta 1000 biztanle gelditzen direla, beraiek soilik dakiten mintzoa dutela. Ez dutela Jinkorik, hortaz egutegirik ere. Hildakoak ez dituztela lurperatzen, bere gisa utzi eta joan egiten direla. Beti ibiltari, non janaria hantxe gelditu. Eta horrela, 100.000 urte? 50.000? ez daki, axolarik ere.

Algaraka ederrean itzuli dira gizonak, solas eta keinuz euren arrakasta azalduz. Mandril batzuk hil dituzte; hantxe bertan sua egin erre, eta oturantz ederra egin dute, gero pusketa batzuk etxekoentzako ekarri dituzte, larruak ere, jantziak egiteko. Lagun batek kautxuzko kamioi zirrika bat ekarri du, oinetakoak egiteko, orain arte ñu edo zebra larruekin egiten dituzte oinetakoak, baina, modernitate pixka bat, zergatik ez?