SAPIENS

Ibaiak, zuhaitzak, zaldiak, txoriak... Omo Sapiens-ek ikusi, ukitu eta haietaz baliatu, horixe egiten zuen, hortaz errealitate objektiboak ziren; bertze aldean asmatutako errealitate subjektiboak, Jinkoak, herrialdeak, multinazionalak... Asmatutako errealitatea tinko itsatsi zen Sapiens-en burmuinean, ze egun, ibaien, zuhaitzen, zaldien, eta txorien bizi-irautea, herrialde, multinazional edo Jinkoei esker daiteke bermatu; beraz asmatutako errealitate subjektibo baten baitan.

Gezur bat asmatzea ez da erraza, baina lortuz gero, botere ikaragarria izaten ahal du, eta milioika jarraitzaile lortu. Ikusi berri dugu “Aita Santua” Portugalen duela ehun urte hiru artzaintxori “Ama Virgina” agertu zitzaien tokian miloi bat lagunekin errezatzen. Gertaera bitxia beraz duela ehun urte haurrek ikusitakoa. Demagun baso lainotsu batean, odei artetik argi izpi bat ihes egin eta ortzadar gisa zuhaitz hostotsu batean pausatu zela, suertatzea ere, eskuinuso eder bat bertan egotea, eta haurrei begira gelditzea. Euskuinusoa papar txuri, bizkar beltz-urdin, buztan luze, txori ikusgarria da, bakartia eta urria. Ez dakit zenbat katoliko dagoen munduan, baina, datu objektiborik gabe denek sinesten dute, duela bi mila urte inork ikusi ez duen Jinko batek neskatxa bat ernaldu eta haren semeak salbatuko dituela.

Hurbilago etorri eta, Rodrigo Rato “ospe” handiko gizonak ezkila bat jo, eta edonor egin zuen banku-gizon. Bankua ez zen existitzen, inork ez zekien zertan zetzan, baina denek hartan sinetsi zuten. Eta erosi zituzten akzioak, erosi eta erosi, gero eta garestiago. Ez zekiten zer erosten zuten, baina lehen bi balio zuenak gero lau balio zuen eta gero sei. Egun batean norbait saltzen hasi zen etekinak lortzeko, eta, saltzen, saltzen, beheiti joan zen akzioen balioa, akitu arte. Orduan jabetu ziren haize burbuila ikaragarri bat zela, eta haizea zela erosi zutena. A! Ze pena eta ze dolore, haize burbuila puztu zenean hutsik gelditu ziren, aio aberats eztiak, automobil berria, Karibeko oporraldiak... hori, zorretan gelditu ez zena, ze akzioak erosteko etxea hipotekatu zuena bazelako.

Argia ez da ikusten

baina,

argirik gabe ez da ikusten

.