AITA SORGIN

1502an Baionatik Hondarribira abiatu ziren Joana Eroa eta Felipe Ederra. Flandestik Kastilarako bidean, Baionan lehorreratu eta gurdiz jarraitu zuten Hondarribiraino. Bideak arras txarrak ziren nonbait, eta nekez ibili zen haien gortea. Felipe nazkaturik, bidea zaldiz egitea otu zitzaion. Joanak senarra zaldi gainean bi hankak alde batera emakume gisa ikusi zuen, eta larritu zen. Gizona, ipurtzuloa odol-pikoz lepo, egoera lastimagarrian aurkitzen zen.

Hondarribian Egiluz jauregian egokitu zen bikote Erreala, eta Joanak jakin zuenean bazegoela sorgin bat horrelakoak sendatzeko aproposa, haren bila bidali zituen gudariak. Sorginak Felipe ikusi zuen bezain laster gertatzen zitzaionaz jabetu eta behar zituen belar eta ukenduak eskatu zituen. Aita Sorgin ospe handiko sendagilea zen, egun pare batez sendatu zuen gizona. Felipe Ederrak horrela erran zion sorginari: “eska iezadazu nahi duzuna, egin didazun mesedea gaitik”.

“Zoaz hemendik eta ez itzuli egundaino” Izan zen Aita Sorginaren eskaera.

323K.A. Grezian sortu zen Diogenes. Filosofoa zen, eta erromes eskean ibiltzen zen. Buztinezko ontzi handi batean bizi omen zen, eta egun batean Alejandro Magno, haren ospeaz aditua hurbildu zitzaion aholku eske. Diogenes eguzki aldera atseden hartzen zegoen, eta Alejandro Magnok agurtzerakoan ea zerbait behar zuen galdetu zionean, filosofoak horrela erantzun zion:” bai, zazi haraxeago itzala egiten didazu eta”.

Ez dut uste gure Aita Sorginak Diogenes ezagutzen zuenik, erantzun berdintsua ematea kasualitate hutsa izanen zen doike. Batzuetan gertatzen dira horrelakoak.