KUTXAZAINA

Gau hartan hiru gaztetxo institutuko lagunekin afaldu ostean etxera abiatu ziren. A. eta P. lehengusinak ziren, L. P.ren neska laguna bizikleta eskuan. A.ren guratsuak Paristik itzuli bat egitera joanak ziren, eta P.k lehengusinaren etxean lo egiteko baimena bazuen. Azken garagardoa hartzea etxerako bidean otu zitzaien, dirurik gabe gelditu, eta kutxazain bat bila hasi ziren. Kale pare bat ibili eta topatu zuten, beirazko ate handi baten babesean kutxazaina barnean izaten duten horietako bat. Gauerdia zen ordurako, eta kalean ez zen inor ageri.

P. sartu zen dirua hartzera, A. eta L. kanpoan gelditu ziren zain. Gutxira atera zen P. Egin duk?, galdetu zioten kideek. Bai to! Kristoren sustoa hartu diat. Zer duk ba? Galde egin zioten kideek. Hor barnean bazagok norbait. Jode! Ia gainean erori nauk. Lo zaku baten barnean zagok lo. Jode! Usain kirats ikaragarria duk, ezin diagu hortik dirurik atera, goazen hemendik.

Eztabaidan hasi ziren: ez gaituk hemendik joanen dirurik gabe, dirua hartzea gure eskubidea duk, zerri horrek kutxazain batean lo egiteko ez dik eskubiderik. Ni sartuko nauk, erran eta A. sartu zen. Txiroak aretoa ia betea zuen bere gorputza luzean etzan eta poltsa pare batekin. Mutila aserre, kiratsak zorabiaturik ostikoka hasi zen txiroa jipoituz. Utikan! Ospa hemendik zerri hori! oihuka. Etxegabea esnatu zen eta kexu, erdi negarrez, ai-eneka mugitu eta aurpegia agerian gelditu. Ez ustekoak arrapatu zuen A. txiroa andrazkoa zela ohartu zen eta. Puta zahar bat duk! erranez atera zen. L. bizikleta hartu eta etxera bazihoala erran zuen. Ze beti bezala? Gauzak hontzen direnean hi etxera... hasi zitzaion P. Ez iezaiok jaramonik egin neskak horrelakoak dituk eta, bota zion A.k

Eta orain zer? Goazen etxera, zion P.k, ezta pentsatu ere, erantzun zion A.k Ez gaituk koldar batzuk. Zorrizu madarikatu horiek utz nazazue bakean!. Aditu zuten kutxazain barnetik. Mutilak berotu ziren, ordurako bazituzten garagardo batzuk gainean. Biak batera sartu ziren aretoan txiroa handik atera nahian, baina hark gotor aurre egin zien. Puta kumea! Zaborrez inguratua nahi dun bizi, no! zaborra. Eta espaloian zaborrontzi batzuen ondoan zeuden hondakin batzuk hartu eta emakumearen gainean botatzen hasi ziren. Hondakin zakuak, eta telebista zahar bat ere. Emakumea kexu, oihuka, utz nazazue bakean!. Alfer zikina! ez dun lanik egin nahi? Zer nahi dun gure bizkar bizi. No! jan ezan, erranez, janari hondakin poltsa bat erdi usteldua bota zion A.k. P.k bidoi bat ikusi zuen, hutsa zegoen, oraindik umel, usaindu zuen eta gasolinarekin ibilia zela nabaritu zuen. Sakelan metxero bat eramaten zuen beti, ( P.k ez zuen erretzen, baina neskek zigarreta bat ateratzen zutenean adi egoten zen sua emateko) metxeroa biztu, bidoiari su eman eta kutxazain aretoan bota ondoren etsi zuen atea.

Albisteak hedabideetan oihartzun handia izan zuen. Emakumea hilik aurkitu zuten. Ez zen surik biztu, baina bidoia garrik gabe erre zen ke toxikoz aretoa betez. Kutxazain segurtasun kamerak hartutako iduriak behin eta berriz telebistan jarri zituzten, herritarren laguntza eskatuz. Gaua hura lanbrotsua izan zen eta iduriak ez ziren onak. Idurietan ez zen emakumea ikusten, kamerak kutxazainean sartu eta atera egiten zirenak soilik hartzen zituelako. Gazteak irrika lehenik, parrez leher zorian gero, zaborra hartu eta aretoan botatzen, atea ostikoka, ematen zuen oihuka ere ari zirela. Bidoia zuria zen eta argi ikusten zen metxeroarekin su emateko keinua. Kiroletako oinetakoak, bakeroak, txamarra iluna eta azken garaian moda-modan zegoen bixera buruan, gazteen janzkerak marka onekoak, garestiak ziren. Datu hauek denak aztertuz, poliziaren susmoaren arabera, gaizkileak adin txikikoak ziren eta familia onekoak.

Bordeaux ardoa hur batzuekin, aperitibo gisa hartzen ari ziren A.ren aita eta ama afal aitzinean. A.ren aita eragin handiko politikoa zen, ama, barne-dekoratzailea, bera ere arrakastatsua. Goizean egunkarian irakurria zuten albistearen xehetasunak eta kutxazaineko kamerak hartutako iduriak arratseko telesaioan ematen ari ziren. Senar emazteak isil-isilean ikusi zituzten iduriak eta kazetarien hausnarketak aditu.

_Ez dira gure gazteak oso originalak, denak berdin egiten dira jantzi, aise aski gure semea izan zitekeen haietako bat. Badugu zer eginik..._ Bertzerik gabe bota zuen gizonak.

_Ardo gehiago nahi? _ Hurbildu zuen emazteak botila ardoa senarraren kopara.

-