Gauzak gertatu ziren
lekuari, etxea deitzen zioten.
Baita gerta ez beharra,
gertatu zen tokiari ere.
Goizeko ihintzekin abiatu
ziren.
Gibelat behatu gabe,
gatzezko estatu bihur ez zitezen.
Itxaropena eta minaren
arteko muga hartan;
gurutzatu zuten
Artanzuteko zubia; sei ume, gaztena besoetan, altzariak gurdian,
txakurra jarraian, aldapa gora egin zuten, errepideko bidean.
Gibelat utzi zuten
bizimodu bat.
Sukaldeko beroa, gaztaina
erreen eta taloen usaina gozoa.
Mendian erruten zuen
oiloaren arrautzen zaporea.
Bazkotako gaztanberaren
gurina, bildotsaren xamurra.
Lixibaren garbi usaina,
putzuan, igelaren korroka.
Belarra metatu ondoko
merienda.
Eskuz harrapatutako
arrainen gutizia.
Sabaileihoko ontzaren
begirada beilegia. Oilarraren argi-hasteko kukurrukua.
Igandetan mezara gateari
utzi zioten. Ez zela konfesatzeko bekaturik ikasi zutelako.
Horiek denak eta gehiago,
utzi zituzten gibelat, egun batetik bertzera folklore bihurtuko
zirelarik.
1956Ko udaberri hartan,
Mikaela eta Xalbador, naiz eta jakinen gainean ez egon, antzina moztu
eta modernitatean sartuko ziren. Bidasoa bazterrean egokitu eta,
umeak eskolara bidaliko zituzten, eta gaztena unibertsitatera ere;
eta hantxe galdu zuen neskatxak euskara.
Gurdia eta abrearen ordez
autoa,
goldea eta lera beharrean
traktorea.
Presiozko eltzea, butanoz
ornitutako labea.
Iturriko ur beroa.
Egon-gelan besaulki bi;
parez pare telebista.
Mendeko tenperaturik
hotzenak ikaratu zuen Europa.
Kuban Fidel Castro
lehorreratu zen 82 iraultzaileekin.
Pio Baroja eta Bertol
Brecht zendu ziren.
No hay comentarios:
Publicar un comentario