Mikaela Goizuetakoa
Goizuetako mendiak, oihanak,larreak eta belaiak dira ederrak.
Han sortu zen behin lore basa, ederra liraina, Mikaela erraten ziotena.
Mikaelak bizia maite
zuen, ez zuen onartzen zentzurik gabeko mugarik. Baserriko lanak egin eta arratsalde
apalean, ostatura joatea gustuko zuen. Zigarreta bat erre eta ardo pare bat
hartu. Ostatuan beti zen emakume bakarra,
eta horrek berezia egiten zuela bazekien, baina ez zuen gehiegi arduratzen.
Nekazari lanetan trebea zen, idiak lotu eta iretziak biltzera joaten zen
bakarra zen inguruan, lan horiek gizonen gain baitziren. Ostatu erausi bihurtu, eta gizona ala emakumea
zen, eztabaida sortu zen. Herriko
gizonik arrena Mikaelarekin tematu zen. Baina ez zitzaion lore xorta batekin limur
hurbildu, ez, ilunabar batez zakarki sasi batera eraman eta bortizki bortxatu
zuen. Mikaelak aurre gotor egin eta larriki zauritua joan zen bortxaketa salatzera.
Epaitu zuten gizona, eta hauxe libro utzi zion defentsa.” Nahi nuen jakin emea
ala arra zen”. Ez zen horretan gelditu emakumearen zoritxarra. Urte batzuk geroago kontrabandoan mendian
eltzetzuak hartu zuten, eta jipoitu zuten, ondorioz hil egin zen. Mikaela aitzindari
bat izan zen. Bideak ireki zizkigun, hainbat eta hainbat emakumek bezala bere biziarekin
ordaindu zuen ausardia. Baina ez zen
alferrikakoa izan.
Laborantza Berrikuntza Sari
Nazionala hartu du Maitek. Goizuetako magiak limurturik, baserri batean egokitu den bertze lore
basa bat dugu Maite. Hiru ume, ttikiena besoetan, berrogei ahuntz erosi eta
hasi zen biziari aurre egiten. Etxea konpondu, ura eta argi indarra ekarri,
bidea zabaldu, lurra goldatu eta barazkiak landatu. Haurrak eskolara eraman,
zaindu, elikatu… Erosi zuen lehendabiziko behia gutira hil zitzaionean, erran zion aldamenekoei, ez zekiela zertaz hil zen
animalia.” Ba zaharra zelakoz” erantzun zion ondokoak. “Ba, zaharra saldu didatelako” pentsatu zuen
bere baitan. Eta ikasiz joan zen, emakumea zen, eta mesfidantzaz begiratzen
zuten, horrelakorik ezagutu ere, ze ari zen emakume bakarra baserri buru? Baina
ez zuen gibelat egin, inondik ere! Ez zituen behiak ukuiluan nahi, libro nahi
zituen.” Betixu” jatorrizko euskal behi basa talde batekin hasi zen. Taldea handituz joan da…
Emakume Abeltzain
sarea sortu dute bera bezalako ausartek euren eskarmentuak partekatu ahal
izateko.
No hay comentarios:
Publicar un comentario