LALIBELA

Gindoazen gogotsu, Abune Yusef lau mila metroko mendiaren mazelak gurutzatzen, ikaragarrizko erroitz artetik genekusan ibarrak liluratzen gintuela; ehunka nekazari herrixka, zeinek, txinoei esker etxolak txapaz estaliak zeuzkaten; Etiopiako ipar aldean geunden, Lalibela-ko bidean.

Etiopian ehun miloi biztanle bizi dira, haietatik laurogei miloi nekazari. Musulini-k 1936an Etiopia inbaditu zuen, eta betiko bideak egin zituen asfaltatu. Milaka urte zeramaten behiak, ahuntzak eta astoak bide haiek egiten ura edateko putzuetara. Animaliak burmuinean GPSa zuten kokatua, eta inork inoiz ezin izan zituen handik lekutu. Are gehiago, lehentasuna argi zuten, lehenik eurek, gero ahal zenean gure “todo terrenoa” astiro, poliki...

Lalibela 1160 aldera sortu eta erlekume batek inguratu zuen, handik datorkio izena,(lalibela erlekumea amarikoz) Bere amak patu onaren zeinutzat hartu zuen gertatutakoa eta errege izanen zela aurresan zuen. Eta, hala izan zen errege 1181tik 1221arte. Giristinoa zen eta musulmanek Jerusalen inbaditu zutenean Etiopiako ipar aldean, mendi artean, inoren bidean, Jerusalen berri bat eraikitzea erabaki zuen. Hamaika eliz lurpeko harkaitzartean zizelkatzeko agindua eman zuen.

Kondairak dionez, erregea Jinkoak bahitu eta zerura eraman zuen, non eraikin zoragarriak erakutsi zizkion, eta bere herrira itzuli eta bertan ikusitakoak eraikitzeko erran zion. Kondairarekin jarraituz, aingeruak langileren laguntzera etortzen ziren, eta iluntzean aingeruak jarraitzen zuten lanarekin.

Eliz bat bederen gau batez aingeruek egina omen.

Elizak ederrak dira, sinesgaitzak, ehun urtetan eginak, gehienak harri bakarrean garatuak,  hamar bat metro altu, bide eta terrazez inguratuak eta tunel eta pasa bidez elkar lotuak, xarmantki dekoratuak eta nahiko ongi kontserbatuak.

Lekua kezkagarria da, misteriotsua, harrigarria. Erromesak jite agurgarrian zuriz jantziak, makil bat eskuan, gurutze handiak ageriko, Jinkoaren erregu, bakarka edo multzoka, isilean edo doinu tristean errezitatzen... ni bezalako fede gutiko batentzako...

Kiristian ortodoxoen hiri saindua da. 2005An Unescok humanitatearen ondasuna izendatu zuen Lalibela.